Cerneglons - Vichipedie

Cerneglons al è un paîs di 650 personis in comun di Remanzâs, ma logât plui dongje a Pradaman.

Il paîs al è cognossût dal 1296 e il non al ven cuasi ciertementri fûr dal slâf crn (che al vûl dî neri). A son stâts cjatâts rescj di prin dai romans, ma soredut il mût di semenâ lis cjasis sparniçadis pai cjamps al samee puartâ a lidrîs celtichis. Alc al è restât ancje de gjeometrie che a davin i romans ai cjamps, ma dome soreponude al stamp di chei prin di lôr. Intal cuatricent Cerneglons al jere part de Gastaldie di Cividât, sot di un cjapitani venezian e par chel al scugnive paiâ lis tassis al sô Cjapitul. Intun document dal 1539 al è innomenât Cerneglons par vie che, dopo une cjaristie, al veve istès di paiâ lis tassis, cusì no vevin di passâsile propit masse mal. Tal 1560 la Tor, lant fûr dal sô jet, e à sdrumât la plui part dal paîs lassant nome maseriis: di 34 cjasis si son salvadis nome sîs o siet. Ce cal reste dal paîs medievâl, je la borgade clamade Cerneglons Vecjo, cumò logade in Comun di Pradaman. Tai prins agns dal Sietcent il paîs al si è sestât dulà che l è cumò. Sot dai venezians cualchi citadin dal paîs al è stât parfin marinâr. Da un censiment dal 1740 il paîs al jere fat di 10 cjasis, 7 coloniis, 46 cjasis rurâls; la tiere a jere arade pai 3/4 e pal restant tignude a prât, e prevalevin il forment, la siale e la blave. Tal Nûfcent i zovins a lavin al cine a Pradaman, intal curtîl di Mussat subite dopo la vuere. La prime television e je rivade tal 1955 là jù de ostarie "Ai cacciatori". Il puint par lâ a Pradaman fat sù tal 1978 al à tacât il pais a Udin, che prime bisugnave lâ pai vâts, massime di chel bande Laipà; il trafic al è aumentât cu la costruzion de gnove provinciâl.