Colôr - Vichipedie

Il colôr al è la sensazion che e ven dai rais de lûs che van a impressionâ i orghin de viste. Il fenomen fisic che al da dongje a dutis lis infinidis combinazions de lûs al va daûr de la lungjece de onde inte zone che si viôt. La sensazion nus permet di viodi come difarents obiets cun plui grande precision.

Ducj i cuarps che a cjapin la lûs a assorbissin une part da lis ondis eletromagnetichis e tornin a mandâ indaûr chês che a vanzin. Chês mandadis indaûr a vegnin cjapadis dai voi e letis come colôrs daûr de lungjece de onde. Il voli uman al po lei il colôr nome cuant che la lûs e je ben clare. Cun pocje lûs o viodin blanc o neri. Il colôr blanc al ven dal meti un su chel altri ducj i colôrs; chel neri al ven fûr gjavant ducj i colôrs. La lûs blancje e po jessi dividude in ducj i colôrs (spetri) midiant un prisme. In nature cheste division si po viodile intal Arc di Sant Marc.

Il colôr al è nuie altri che ce che o rivin a percepî dai segnai gnervôs tai voi dulà che a son i recetôrs de lûs inte retine. I recetôrs a mandin segnai al çurviel cuant che assorbissin radiazions di nature eletromagnetiche che a lôr volte a vegnin di une ben marcade intensitât di lungjece di onde.

La formazion de la percezion dal colôr e ven in trê moments:

1. Intun prin moment un grup di fotons (che a sticin il voli) al rive al voli traviersant la cornee, l'umôr de aghe, la pupine dai voi, e l'umôr di veri rivant fintremai ai recetôrs de lûs inte retine (a bachet e a coni), là che al ven assorbît. Il risultât dal assorbiment a son trê segnai gnervôs eletrics, (o trasduzion) in modulazion di amplece.
2. Intal secont moment si cjate te retine une trasformazion dal segnâl. Al ven elaborât e comprimût, fasint di trê un, in modulazion di frecuence: a son segnai in oposizion che a van al çurviel vie pal gnerf otic.
3. Intal tierç e ultin moment a si cjate la leture dai segnâi e la lôr interpretazion de bande dal çurviel e la vere percezion dal colôr.

• Liste dai colôrs