Fassisim - Vichipedie

Il fassisim e je une dotrine politiche nazionaliste e totalitarie di estreme diestre nassude in Italie par opare di Benito Mussolini che puartâ ae ditature dal 1922 al 1943. Par estension il tiermin al ven doprât par indicâ, moviments estremiscj, guviers ditatoriâi di diestre e in gjenerâl ategjaments e compuartaments no democratics, raziscj e intolerants.

La peraule e ven dal talian fascio (fas) che al sarès il simbul che dopravin i litôrs romans tant che simbul di union e justizie.

Il fassisim al nas in Italie tai agns dopo la prime vuere mondiâl par opare di Benito Mussolini. Si trate di un moviment nazionalist e antidemocratic che in curt si met de bande dai bacans e dai parons des fabrichis cuintri i sindacâts e i partîts di ispirazion socialiste.

La borghesie taliane, spaventade di chel che al jere sucedût in Russie, e viodè Mussolini tant che l'om bon di fâ tornâ l'ordin. Lis azions violentis dai scuadriscj, che a pestavin i aversaris politics cui manganei o che i fasevin bevi il vuelin di ricin, a forin dopradis cun regolaritât dal fassisim.

Tal 1922 e fo la marcje su Rome di Mussolini e dai soi oms cu la cuâl al rivà al guvier.

Daspò tantis violencis (come il delit Matteotti) al limità la libertât di peraule e al abolì ducj i partîts; la Cjamare dai Deputâts e fo disfate par lassâi puest a la Cjamare dai Fas e des Corporazions dant vite a la ditature.

Tai agns 30 il regjim al deventâ aleât de Gjermanie di Hitler e al adotâ lis leçs raziâls.

Dopo lis vueris di Spagne e di Etiopie al entrà te seconde vuere mondiâl tal Jugn dal 1940 cuant che cu la sconfite de France la vitorie e sameave aromai dongje.

Nol fò cussì e dopo il sbarc dai merecans e dai inglês in Sicilie tal 1943 il Re al arestà Mussolini. I todescs lu liberarin e cussì al podè fondâ te alte Italie la Republiche di Salò che e là indenant fin al Avrîl dal 1945 cuant che a rivarin i aleâts e Mussolini al fo copât dai partigjans.

Ancje se in misure minôr rispiet a ce che al sucedè in Emilie Romagne e in Toscane ancje in Friûl e fo la azion violente dai scuadriscj fassiscj tai prins agns 20.

Dopo la nassite de ditature la situazion si stabilizà. In Friûl fo puartade indenant une fuarte politiche nazionaliste cuintri lis minorancis sclavis e todescjis.

E fo une politiche di italianizazion fuarçade, si improibî l’ûs di lenghis diferentis dal talian, si cirì di fâ emigrâ in Austrie i carinzians de Val Cjanâl, si obleà il gambiament dai cognons che no someavin talians, si spostarin in altri bandis de Italie i mestris elementârs che a fevelavin sloven e v.i.

In cheste suaze il regjim al doprâ, almancul in part, il furlan come mieç par cirî di latinizâ i cunfins orientâi. Il furlan al fo viodût tant che un dialet dal talian che però nol fo ostegjât cussì tant come i altris dialets atôr pe Italie.