Elçin Hüseynbəyli — Vikipediya

Elçin Hüseynbəyli
Təxəllüsü	Qaraçuxa
Doğum tarixi	23 dekabr 1961(1961-12-23) (63 yaş)
Doğum yeri	Mahmudlu, Cəbrayıl rayonu, Azərbaycan SSR, SSRİ
Vətəndaşlığı	SSRİ Azərbaycan
Milliyyəti	azərbaycanlı
Fəaliyyəti	yazıçı
Əsərlərinin dili	azərbaycanca
Tanınmış əsəri	Şah Abbas
Üzvlüyü	Azərbaycan Yazıçılar Birliyi
Mükafatları	2019

Elçin Hüseynbəyli (23 dekabr 1961, Mahmudlu, Cəbrayıl rayonu) — yazıçı-dramaturq, publisist, Azərbaycan Yazıçılar Birliyinin üzvü, "Ulduz" jurnalının baş redaktoru (2004–2014)^[1], "Ədəbiyyat qəzeti"nin baş redaktoru (2014).^[2] Azərbaycan Yazıçılar Birliyi sədrinin müşaviri (2014), AYB-nin katibi (2021), Azərbaycan Respublikasının Əməkdar incəsənət xadimi (2019).^[3]

Elçin Hüseynbəyli 1961-ci il dekabrın 23-də Cəbrayıl rayonunun Mahmudlu kəndində anadan olub. 1979-cu ildə həmin rayonun Şükürbəyli kənd orta məktəbini əla qiymətlərlə bitirib. 1980–1982-ci illərdə keçmiş Sovet ordusunda piyada qoşunlarda uğurlu hərbi xidmət keçib, "əlaçı əsgər" döş nişanına layiq görülüb.

1989-cu ildə M. V. Lomonosov adına Moskva Dövlət Universitetinin jurnalistika fakültəsini fərqlənmə diplomu ilə bitirib.

1997-ci ildə Varşavada "İnsan haqları yay məktəbi"nin məzunu olub. 1999-cu ildən müxtəlif KİV-də, o cümlədən "Azadlıq" radiosunda işləyib, radionun Bakı bürosunu yaradıb. Azərbaycanda yeni informasiya modelini ilk təqdim edənlərdəndir.

2004-cü ilin mayında AYB sədri Anarın təqdimatı ilə "Ulduz" jurnalının baş redaktoru seçilmiş, 27 mart 2014-cü ilədək bu vəzifədə çalışmışdır. "Ədəbiyyat qəzeti"nin baş redaktoru, AYB sədriinin müşaviri olmuşdur.^[4] 2021-ci ildə AYB katibi seçilmişdir. Xalq yazıçısı Anar onu yeni nəsil ədəbiyyatının layiqli təmsilçisi və sintetik janrlarda yazan qələm adamı kimi dəyərləndirib: "Elçinin timsalında ədəbiyyatımızda çox istedadlı, maraqlı, bənzərsiz, orijinal bir nasir yetişmişdir. Onun əsərlərində sürrealizm, əfsunlu realizm elementləri də var, mifik təfəkkür də, folklora bağlılıq da və bunların sintezi süni deyil, yazıçının daxili dünyasından keçirilmiş bir sintezdir".

E. Hüseynbəyli haqqında ölkənin ən tanınmış ədəbiyyat adamları 200-ə yaxın məqalə yazıblar. O, Türk Dünyası Ədəbiyyat Dərgiləri Konqresinin baş katibi, rus dilində nəşr olunan "Güney Qafqaz" dərgisinin Azərbaycan üzrə koordinatoru və redaktorudur.

Ümumdünya azərbaycanlıları qurultaylarının nümayəndəsidir.

2000-ci ildə istedadlı gənc yazar kimi Prezident təqaüdünə, 2008-ci ildə isə Prezidentin xüsusi mükafatına layiq görülüb.

2001-ci ildə "Yusif Səmədoğlu adına ən yaxşı nəsr əsəri", 2007-ci ildə "Humay", 2009-cu ildə Mədəniyyət və Turizm Nazirliyinin "Qızıl kəlmə" (nəsr üzrə ilk nominant kimi), Türk Dünyası Araşdırmaları Uluslararası Elmlər Akademiyasının "Qızıl ulduz" medalına, "Nizami Gəncəvi" adına medala, Türksoyun "Çingiz Aytmatov" və "Məhdimqulu" medalına, eləcə də bir sıra ədəbi ödüllərə layiq görülüb. O, Türk Dünyası Araşdırmaları Uluslararası Elmlər Akademiyasınnı fəxri doktorudur.

Hekayə və romanları ali və orta məktəblərdə tədris olunur.

Birinci Qarabağ savaşında hərbi müxbir kimi fəaliyyəti genişmiqyaslıdır.^{[mənbə göstərin]}

"Rəqs edən oğlan", "Balıq adam", "İki nəfər üçün oyun", "Cənab 21-ci əsr", "Yovşan qağayılar", "Tut ağacı boyunca", "On üçüncü həvari, 141-ci Don Juan", "Şah Abbas", "Metro vadisi", "Yolayrıcında qaçış", "Azıx", "Şimallı gəlin", "Kopelhausda bir axşam", "Yenə iki Od arasında", "Gözünə gün düşür", "Ağ və qara", "Vida", "Dənizin nağılları" kitablarının, on iki romanın, yüzdən çox hekayə, esse və bədii məqalənin müəllifidir.

Onun roman və dram əsərləri əsasən sintetik janrlardadır: dünən, bu gün və gələcək. Təhkiyəsi axıcı, üslubu fərdidir. Əsasən milli problemləri qabardır, amma dünyanı bütöv qavrayır. Roman və dramları konkret ideyaya əsaslanır, süjet xətti kəskin intriqa üstündə qurulur. Əsərləri ingilis, rus, alman, fransız, polyak, ukrayna, litva, koreya, fars və s. dillərə tərcümə olunub, türkdilli xalqların dillərinə uyğunlaşdırılıb.

Kitabları Türkiyə, İran^[5], Rusiya, Litva, Özbəkistan və Gürcüstanda nəşr olunub.

Avropa Birliyinin regionda münaqişə tərəflərilə bağlı müxtəlif layihələrin iştirakçısı və əlaqələndiricisidir.

Azərbaycan Yazarlar Klubunun yaradıcısıdır. Klub əsasən Qarabağ münaqişə bölgəsində layihələr həyata keçirib. Sənət adamlarının münaqişə bölgəsinə səfərlərini təşkil edib.

Pyesləri ölkə içində və dışında dəfələrlə oynanılıb.

24 may 2019-cu ildə "Azərbaycan Respublikasının əməkdar incəsənət xadimi" fəxri adına layiq görülmüşdür.^[6]

Evlidir. İki övladı var, siyasi mənsubiyyəti yoxdur. Mərkəzçidir.

1. Rəqs edən oğlan, Bakı, Adiloğlu, 2001, 200s.
2. İki nəfər üçün oyun (Pyeslər), Bakı, Adiloğlu, 2005, 560s
3. Cənab XXI əsr, Bakı, "Adiloğlu, 2005, 525 s.
4. Yovşan qağayılar (roman və hekayələr), Bakı, Adiloğlu, 2005, 344s
5. Şah Abbas, Bakı, Adiloğlu, 2008, 368 s.
6. Şah Abbas, Bakı, Qələm, 2009
7. Metro vadisi, Bakı, Vektor, 2009, 390s.
8. On üçüncü həvari-141-ci Don Juan, Bakı, Adiloğlu, 2007, 376 s.
9. Şimallı gəlin (hekayələr)/ "525 Kitab seriyası", Bakı, Mütərcim, 2010,52 s.
10. Metro vadisi, Bakı, Qələm,2013
11. Balıq adam, Bakı, Qələm, 2013
12. Azıx, Bakı, Qələm, 2013
13. Firuzə qaşlı xəncər, 2013^[7]
14. Aişə, Bakı, Qələm, 2014
15. Onüçüncü həvari- 141-ci Don Juan, Bakı, Qələm, 2013
16. Yenə iki od arasında, Bakı, Qələm, 2017
17. Gözünə gün düşür, Bakı, Yeni poliqrafist, 2018
18. Uşaqlar üçün: "Dənizin nağılları" (azərbaycan türkcəsində və rus dilində) 2021, Qələm Nəşriyyatı
19. "Banuçiçəyin rəngli yuxuları" (azərbaycan türkcəsində və rus dilində) 2024, Qələm Nəşriyyatı
20. Türkiyə türkcəsində : 1. Sılaya Dönüş, Ankara, (Çevirenler: İmdat Avşar, Ömer Küçükmehmetoğlu)"Bengü", 2011 ; 2. Azerbaycanlı Don Juan (Çeviren: Cumhur Turan), İleri Yayınları, 2013 3. Şah Abbas (Çeviren: Cumhur Turan), İleri Yayınları, 2013
21. Rusca: 1. "Шаги командора, или 141-й Дон Жуан" (Перевод: Сиявуш Мамедзаде), Баку, Перо, 2013; 2. "Игра в…" Баку, Мутарджим, 2019
22. Litvaca: Pılkojo Asılo Laıskaı (Apsakymai), Vilnius, 2017

• "Qaçaq qocalar" tamaşası nümayiş olunub
• www.goodreads.com — Elçin Hüseynbəyli