Oh, whistle and I'll come to you, my lad

  O, whistle, and I'll come to you, my lad,
  O, whistle, and I'll come to you, my lad,
  Tho' father and mither and a' should gae mad,
  O, whistle, and I'll come to you, my lad.

Come down the back stairs when you come to court me,
Come down the back stairs when you come to court me,
Come down the back stairs, and let nae body see,
And come as ye were na coming to me.

  O, whistle, and I'll come to you, my lad;
  O, whistle, and I'll come to you, my lad;
  Tho' father, and mother, and a' should gae mad,
  O, whistle, and I'll come to you, my lad.

But warily tent, when you come to court me,
And come na unless the back-yett be a-jee;
Syne up the back-stile, and let nae body see,
And come as ye were na comin' to me,
And come as ye were na comin' to me.
  O, whistle, etc.

At kirk or at market, whene'er ye meet me,
Gang by me as though that ye cared na a flie;
But steal me a blink o' your bonnie black e'e,
Yet look as ye were na lookin' at me,
Yet look as ye were na lookin' at me.
  O, whistle, etc.

Aye vow and protest that ye care na for me,
And whyles ye may lichtly my beauty a wee;
But court na anither, though jokin' ye be,
For fear that she wyle your fancy frae me,
For fear that she wyle your fancy frae me.
  O, whistle, etc.