Equinox (qrup) — Vikipediya
Equinox | |
---|---|
![]() | |
Əsas məlumatlar | |
Üslub | pop musiqisi |
Fəaliyyət illəri | 2018–h.h. |
Ölkə | ![]() |
Leybl | Symphonics International |
Heyət | Jana Berqendorf Qeorqi Simyonov Conni Manuel Trey Kempbell Vlado Mixaylov |
![]() |
Equinox — Bolqar ifaçılar Jana Berqendorf, Qeorqi Simyonov, Vladimir Mixaylov və Amerikan ifaçıları Conni Manuel və Trey Kempbelldən təşkil olunan Bolqarıstan musiqi qrupu. Qrupun prodüseri Borislav Milanov qrupun adının gecə və gündüzün bərabərliyi anlamına gələn Ekinoks terminindən götürüldüyünü bildirmişdir.
Equinox qrupu "Bones" mahnısı ilə Bolqarıstanı Portuqaliyanın paytaxtı Lissabonda keçirilən 2018 Avroviziya Mahnı Müsabiqəsində təmsil etmişdirlər.[1][2] Müsabiqənin final mərhələsinə yüksələn qrup nəticədə 166 xal toplayaraq, 14-cü yerdə qərarlaşmışdır.
Heyət
[redaktə | mənbəni redaktə et]![](http://upload.wikimedia.org/wikipedia/commons/thumb/f/fe/ESC2018_-_Bulgaria_07.jpg/220px-ESC2018_-_Bulgaria_07.jpg)
Jana Berqendorf (bolq. Жана Бергендорф) 20 oktyabr 1985-ci ildə Bolqarıstanın paytaxtı Sofiya şəhərində anadan olmuşdur. O, 7 yaşından oxumağa başlamışdır. Jana musiqi ailəsindən gəlir və onun anası və nənəsi musiqiçilər olmuşdurlar. 18 yaşında ikən Berqendorf Cənubi Koreyaya köçmüş və bir müddət orada musiqi fəaliyyətinə davam etmişdir. 2010-cu ildə o, nişanlısı Stefan ilə birlikdə Danimarkaya köçmüşdür. Onlar 2007-ci ildə Cənubi Koreyada tanış olmuşdurlar. O Danimarkada ikən ölkənin X Factor musiqi yarışmasında iştirak etmişdir. Jana 2013-cü ildə Bolqarıstanın X Factor yarışmasında qalibiyyət əldə etdikdən sonra şöhrət qazanmışdır. "Virginia Records" albom şirkəti ilə anlaşması olan müğənninin "Samurai", "Igraem s teb do kraya" və "Dokrai" kimi hitləri olmuşdur. 2014-cü ildə ifaçı Bolqarıstanda "İlin qadın sənətçisi" mükafatına, 2015-ci ildə isə "Ən yaxşı debüt" mükafatlarına layiq görülmüşdür. 2015-ci ildə o, eyni zamanda Bolqarıstanın Forbes jurnalında ölkənin ən tanınmış simalarından biri olaraq göstərilmişdir. Jananın 2010-cu ildə dünyaya gələn Leon adlı oğlu var. Jana Bolqar dili ilə yanaşı İngilis dili, Koreya dili və Danimarka dilində danışa bilir.
Qeorqi Simyonov (bolq. Георги Симеонов) və ya JJ kimi tanınan Bolqarıstanlı müğənni, bəstəkar və prodüserdir. O, 16 yaşında ikən 032 adlı musiqi qrupuna üzv olmuşdur. 2013-cü ildə öz solo karyerasına başlamış, "Po-dobre, che razbrah" və "Dilar na lubov" adlı mahnıları təqdim olunmuşdur. Simyonov 2009-cu ildən etibarən eyni zamanda vokal müəllimi olaraq da fəaliyyət göstərir. O, hər il tələbələri ilə birlikdə yardıma ehtiyacı olan uşaqlar üçün xeyriyyə konsertləri təşkil edir. Simyonov Rumıniyanın X Factor musiqi yarışmasında, Bolqarıstanın isə The Voice səs yarışmasında iştirak etmişdir.
Vladimir Mixaylov (bolq. Владимир Михайлов) Bolqarıstanlı müğənni, bəstəkar və aktyordur. O, eyni zamanda Safo və Sleng qruplarının da vokalistidir. Equinox qrupunun üzvü olmazdan öncə Mixaylov 2017 Avroviziya Mahnı Müsabiqəsində Bolqarıstanı təmsil edən Kristian Kostovu dəstək vokalçı olaraq müşayiət etmişdir. Aktyor kimi o, Benzin (Heights) və All She Wrote filmlərində rol almış və eyni zamanda bir çox xarici filmlərin dublyajında iştirak etmişdir. Mixaylov bir çox Bolqarıstan müğənnilərinə mahnılar bəstələmişdir.
Conni Manuel (ing. Johnny Manuel) Amerikanın Miçiqan ştatındandır. Uşaqlıq illərindən oxumağa başlayan Conni 14 yaşında ikən NSYNC musiqi qrupu ilə birlikdə konsertlərdə çıxış etmişdir. O America's Got Talent məharət yarışmasında iştirak etmişdir. Yarışmada Vitni Hyustonun "I Have Nothing" mahnısını ifa etmiş və həmin video 270 milyondan artıq baxış sayı qazanmışdır. Conni yarışmada yarımfinal mərhələsinədək yüksələ bilmişdir. Yarışmada iştirakını dayandırdıqdan sonra ifaçının "Come Alive" və "Blind Faith" mahnıları təqdim olunmuş və daha sonra Conni Symphonics International şirkəti ilə birlikdə debüt albomu üzərində işə başlamışdır.
Trey Kempbell (ing. Trey Campbell) ABŞ-nin Los-Anceles ştatından olan müğənni və bəstəkardır. O, eyni zamanda "Bones" mahnısının da bəstəkarlarından biridir. Trey Kempbell Dua Lipa, Aleksandra Stan, Bibi Reksa və Culi Berqan üçün də mahnılar bəstələmişdir.
Diskoqrafiya
[redaktə | mənbəni redaktə et]Sinqllar
[redaktə | mənbəni redaktə et]Mahnı adı | İl |
---|---|
"Bones" | 2018 |
İstinadlar
[redaktə | mənbəni redaktə et]- ↑ "Bulgaria:Equinox releases "Bones"". Eurovoxx.net (ingiliscə). 2018-03-12. 2018-03-12 tarixində arxivləşdirilib. İstifadə tarixi: 2018-03-12.
- ↑ "Bulgaria: Five-person group Equinox will sing "Bones" at Eurovision 2018". Wiwibloggs.com. 2018-03-12. 2018-03-12 tarixində arxivləşdirilib. İstifadə tarixi: 2018-03-12.
Əvvəlki: Kristian Kostov "Beautiful Mess" | Bolqarıstan Avroviziya Mahnı Müsabiqəsində ![]() 2018 | Sonrakı: Viktoriya Georgiyeva |