Rayan O'Şounessi — Vikipediya
Rayan O'Şounessi | |
---|---|
irl. Rían Ó Seachnasaigh | |
![]() Rayan O'Şounessi 2018-ci ildə | |
Ümumi məlumatlar | |
Doğum adı | Rayan O'Şounessi irl. Rían Ó Seachnasaigh |
Doğum tarixi | |
Doğum yeri | Raş, Dublin, İrlandiya |
Vətəndaşlığı | ![]() |
Musiqiçi məlumatları | |
Fəaliyyəti | müğənni, bəstəkar |
Fəaliyyət illəri | 2001–h.h. |
Janr | |
Musiqi alətləri | vokal, gitara, piano, saksofon |
Albom şirkətləri | Sony Music, Syco Music, RCA Records |
![]() |
Rayan O'Şounessi (irl. Rían Ó Seachnasaigh; d. 27 sentyabr 1992, Raş, Dublin, İrlandiya) — İrlandiya müğənnisi və bəstəkarı. O, Böyük Britaniyanın Britain's Got Talent məharət yarışmasındakı iştirakı ilə şöhrət qazanmışdır. O'Şounessi ifa etdiyi "Together" mahnısı ilə İrlandiyanı 2018 Avroviziya Mahnı Müsabiqəsində təmsil etmişdir.
Həyatı
[redaktə | mənbəni redaktə et]Rayan O'Şounessi 27 sentyabr 1992-ci ildə İrlandiyanın paytaxtı Dublin şəhərində yerləşən Raş qəsəbəsində anadan olmuşdur. Rayanın özündən böyük Qreham adlı qardaşı və Epril adlı bacısı var. O, Dublin Texnologiya İnstitutunda musiqi təhsili almışdır. Rayan gitara, piano və saksofonda ifa edə bilir və eyni zamanda fərqli müğənnilər üçün mahnılar da bəstələyir.
Rayanın dayısı Qeri O'Şounessi "Without Your Love" mahnısı ilə İrlandiyanı 2001 Avroviziya Mahnı Müsabiqəsində təmsil etmişdir.
Musiqi karyerası
[redaktə | mənbəni redaktə et]The Voice of Ireland yarışması
[redaktə | mənbəni redaktə et]Rayan O'Şounessi 2012-ci ildə İrlandiyanın The Voice səs yarışmasında iştirak etmişdir. Yarışmada ilk mərhələni uğurla adlayan ifaçı Brayan Kennedinin komandasında yer almışdır. O'Şounessi yarışmanın ilk duel mərhələsində məğlub olaraq, iştirakını dayadırmışdır.
Britain's Got Talent yarışması
[redaktə | mənbəni redaktə et]2012-ci ildə O'Şounessi İrlandiyanın The Voice yarışmasındakı məğlubiyyətindən öncə Böyük Britaniyanın Britain's Got Talent məharət yarışmasındakı seçim mərhələsinə qatılmışdır. Yarışmanın ilk mərhələsində ifaçı özünün bəstələdiyi "No Name" mahnısı ilə çıxış ifa etmişdir. İlk mərhələdə münsiflərdən əsasən müsbət rəylər qazanan ifaçı növbəti mərhələyə vəsiqə qazanmışdır. Həmin vaxtda Rayanın Universal Records albom şirkəti ilə müqaviləsi var idi və Britain's Got Talent yarışmasının qaydalarına görə hansısa digər bir şirkət ilə anlaşması olan iştirakçıların yarışmada iştirakına icazə verilmirdi. Münsiflər heyəti O'Şounessini yarışmanın yarımfinal mərhələsinə göndərməyi planlaşdırsa da, ifaçının Universal Records albom şirkəti ilə müqaviləsi olması səbəbindən Rayan yarışmadan diskvalifikasiya edilmişdir. Lakin daha sonra ifaçının şirkət ilə anlaşması ləğv edilmiş və beləliklə onun yarışmanın yarımfinal mərhələsində iştirakına icazə verilmişdir.
O'Şounessi yarımfinalda öz bəstəsi olan "First Kiss" ilə çıxış etmiş və izləyicilərdən ən çox səs toplayaraq, birbaşa finala vəsiqə qazanmışdır. Yarışmanın finalında bir daha "No Name" mahnısı ilə çıxış edən ifaçı nəticədə 5-ci yerə layiq görülmüşdür.
Britain's Got Talent-dən sonra
[redaktə | mənbəni redaktə et]2012-ci ilin may ayında Rayan O'Şounessinin Sony Music albom şirkəti ilə anlaşma imzaladığı bildirilmişdir. Onun "No Name" adlı ilk sinqlı avqust ayında satışa buraxılmışdır. Həmin ayda ifaçının öz adını verdiyi mini-albomu da işıq üzü görmüşdür. Albomda O'Şounessinin özünün bəstələdiyi altı mahnı yer almışdır. Avqust ayının 23-də ifaçı Britaniyanın This Morning səhər verilişində qonaq olmuşdur. O'Şounessi planlaşdırdığı tur çərçivəsində avqust ayının sonundan oktyabr ayının 12-dək Britaniyanın müxtəlif şəhərlərində konsert proqramları ilə çıxış etmişdir.
The Hit yarışması
[redaktə | mənbəni redaktə et]2013-cü ilin iyul ayında Rayan O'Şounessinin İrlandiyanın yeni The Hit mahnı yarışmasında iştirak edəcəyi elan edilmişdir. Yarışmada ifaçı 2012-ci ildə The Voice səs yarışmasında komandasında yer aldığı müğənni Brayan Kennediyə qarşı mübarizə aparmışdır. Yarışma çərçivəsində Kennedi ilə duelə çıxan O'Şounessi nəticədə qalib gələrək, yarışmanın finalına yüksəlmişdir. Finalda ifaçı ikinci yerə layiq görülmüşdür.
2015-hal-hazırda: Avroviziya
[redaktə | mənbəni redaktə et]2015-ci ildə O'Şounessinin "Fingertips" və "Evergreen" adlı iki sinqlı təqdim olunmuşdur. 2016-cı ilin əvvəlində ifaçının digər bir sinqlı olan "She won't wait" təqdim olunmuşdur. Həmin ilin noyabr ayında O'Şounessinin Back to Square One adlı debüt albomu işıq üzü görmüşdür.
O'Şounessi "Together" mahnısı ilə İrlandiyanı Portuqaliyanın paytaxtı Lissabonda keçirilən 2018 Avroviziya Mahnı Müsabiqəsində təmsil etmişdir.[1]
Rayan 8 may tarixində baş tutan Avroviziyanın birinci yarımfinal mərhələsində 18-ci səhnə almışdır. Nəticədə ifaçı 179 xalla yarımfinalda 6-cl yeri tutmuş və dörd illik fasilədən sonra İrlandiyanı Avroviziya finalına yüksəltməyə nail olmuşdur. 26 ölkə təmsilçisinin mübarizə apardığı final mərhələsində mahnısını bir daha ifa edən O'Şounessi finalda ümumi nəticədə 136 xal toplayaraq, 16-cı yerdə qərarlaşmışdır. Bu İrlandiyanın Avroviziyada 2011-ci ildən bəri əldə etdiyi ən yüksək nəticəsi olmuşdur.
O, Avroviziya 1993 qalibi Niv Kavana ilə birlikdə İrlandiyanın 2018 Avroviziya Uşaq Mahnı Müsabiqəsindəki mahnısı üçün çəkilən videoklipdə rol almışdır.
Diskoqrafiya
[redaktə | mənbəni redaktə et]Albomlar
[redaktə | mənbəni redaktə et]İl | Albom adı |
---|---|
2016 | Back to Square One |
Sinqllar
[redaktə | mənbəni redaktə et]İl | Mahnı adı |
---|---|
2012 | "No Name" |
2013 | "Who Do You Love?" |
2015 | "Fingertips" |
"Evergreen" | |
2016 | "She Won't Wait" |
2017 | "Got This Feeling" |
2018 | "Together" |
İstinadlar
[redaktə | mənbəni redaktə et]- ↑ "Ryan O'Shaughnessy to represent Ireland in Lisbon!". Eurovision.tv. 2018-01-31. 2018-01-31 tarixində arxivləşdirilib. İstifadə tarixi: 2018-01-31.
Əvvəlki: Brendan Mürrey "Dying To Try" | İrlandiya Avroviziya Mahnı Müsabiqəsində ![]() 2018 | Sonrakı: Sara MakTernan "22" |